بۇ بەش يىل شۇنچىلىلىك تېز ئۆتتىكى، ماڭا بارمىقىمىزدا چاك چىقارغۇدەك بىر قىسقا ۋاقىتتەك بېلىنىدۇ، ئوغلۇم!
ھېلىقىدەك ئېسىمدە. بەش يىل بۇرۇن مۇشۇ كۈندە، يەنى مۇبارەك جۈمە كۈنىدە دوختۇرخانىغا باردۇق ۋە سىزنى قولىمىزغا ئالغان ئىدۇق. دوختۇرخانا كارىدورىدا ئاق كۆينەك كىيىۋالغان ۋە كىچىك سومكا ئېسىۋالغان مەن سىزنى قولۇمغا ئالغاندىكى روھى ھالىتىم ھازىرمۇ يېپيڭى پېتى تۇرىدۇ: ئاجايىپ خوش بولغان ئىدىم ۋە سىزگە قاراپ كۆزلىرىمگە خۇشاللىق ياشلىرى كەلگەن ئىدى، ئاپىڭىزمۇ سىزنى قولىغا ئالغاندا شۇنچىلىق خۇشال بولغان ئىدى ۋە ئىككىمىز رەببىمىزگە شۈكۈر ئېيتقان ئىدۇق. مانا ھازىر، كىچىك، بۇدرۇق بوۋاقتىن بىردەمدە چوپ- چوڭ بىر ئوغلانغا ئايلاندىڭىز. ئارقامغا قاراپ باقسام، سىز بىلەن ئۆتكەن ھەر بىر مىنۇتنى، ھەر بىر ئەسلىمىنى ئەسلىگىنىمدە، يۈزۈمدە ئىختىيارسىز كۈكلە جىلۋىلىنىدۇ، بەدىنىمنى ئىسسىق بىر ھارارەت قاپلايدۇ ۋە خۇشاللىقتا پۈتۈن بەدىنىم راھەتلىنىپ كېتىدۇ.
مانا ئەمدى چوپ- چوڭ يىگىت بوپ قالدىڭىز! سىزگە قاراپ ئۆزۈمنىڭ بەش ياشقا كىرگەن ۋاقتىمنى ئەسلەپ قالىمەن؛ ئىككىمىزنىڭ بەش ياشقا كىرگەن ۋاقتىنى سېلىشتۇرما قىلىپ باقىمەن ۋە سىزگە ئىچىم كۆيۈپ كىتىدۇ:
بەش ياشقا كىرگەن سىز:
ئۇيغۇرچە تىلىڭىز ناھايىتى راۋان ۋە ئورۇنلۇق، خېلى خېلى گەپلەرنىمۇ راۋان ئىپادىيەلەيسىز.
ئانا تىلىدىن باشقا، تۈرۈكچىنىمۇ راۋان سۆزلىيەلەيسىز ۋە ئىنگىلىزچە ئاددىي سۆزلەرنى ئاڭلاپ چۈشىنەلەيسىز.
ئۇيغۇرچە ھەرىپلەرنى تولۇق تونۇيسىز، ئاددىي سۆزلەرنى باغلاپ ئوقۇيالايسىز. بۇنىڭدىن باشقا ئىنگىلىزچە ھەرىپلەرنىمۇ تونۇيسىز ۋە ئېلىپبە تەرتىپى بويىچە ھەرىپلەرنى يادىغا ئوقۇيالاسىز.
ئانا تىلدا بىردىن مىڭغىچە، ھەتتا ئون مىڭ، يۈز مىغىچە سانىيالايسىز؛ يۈزگىچە سانلارنى قوشۇپ ئالالايسىز؛ يۈزدىن چوڭ بولغان پۈتۈن سانلارنى قوشالايسىز، جۈپ سان ۋە تاق سان ئوقۇملىرىنى بىلىسىز. تۈركچە ۋە ئىنگىلىزچە يۈزگىچە سانىيالايسىز. مىليون، تىرلىيون … سانلارنىڭ بارلىقىنى، سانغىلى بولىدىغانلىقىنى بىلىسىز.
ئىستانبۇلدا تۇغۇلدىڭىز ۋە ئىستانبۇلنىڭ ھەممە يەرلىنى دېگەندەك مەندىن ياخشى بىلىسىز.
يەسلىگە باردىڭىز ۋە ساۋاقداشلىرىڭىز بولدى.
رەڭلەرنى ياخشى تونۇيسىز ۋە ئىسىملىرىنىمۇ بىلىسز.
ئويۇنچۇق ماشىنىلارنى بەك ياخشى كۆرىسىز ۋە بلوك پارچىلىرىدىن ھەر خىل ماشىنا ئايروپىلان… دېگەندەك قاتناش قوراللىرىنى ھەمدە ھەر خىل بىنلارنى ياساپ ئويناشتىن ھېچ ھارمايسىز.
ئۆزىڭىز ياخشى كۆرىدىغان نەرسىلەرنى ياخشى بىلىسىز، قورقماي ئىپادىيەلەيسىز ۋە ئۆزىڭىز قارار ئېلىشنى بىلىسىز.
قىسقا سۈرىلەردىن بىر قانچىسىنى ۋە بالىلار قوشاقلىرىنى ئاڭلاپ يادلىۋاپسىز. بەزىدە ئۇلارنى ئۆزىڭىز ئوقۇپ كېتىسىز؛ ھەتتا بەزىدە سۈرە ۋە ناخشىلارنى ئاھاڭغا سېلىپ غىڭشىپمۇ قويىسىز.
بەش ياشقا كىرگەندىكى مەن:
ئۇيغۇرچە گەپ قىلالىشىم مۇمكىن،(ئانچە ئەسلىيەلمەيمەن) ئەمما سىزدەك راۋان ۋە سىزدەك ئالدى كەينىنى باغلاپ گەپ قىلالماسلىقىم ئېنىق.
ئانا تىلدىن باشقا ھېچقاندان بىر تىلنى بىلمەيتىم ۋە دۇنيادا مەن سۆزلەيدىغان تىلدىن باشقا يەنە نۇرغۇن تىللارنىڭ بارلىقىدىنمۇ خەۋىرىم يوق ئىدى.
ئۈستىدە دېگىنىمدەك، ئۇيغۇرچىدىن باشقا تىل بارلىقىنىمۇ بىلمەيتتىم ۋە ئۇيغۇرچە ھەرىپلەرنىمۇ تونۇمايتتىم.
ئۇ ۋاقىتلاردا مەندە ساناش دېگەن ئوقۇم تېخى بولمىسا كېرەك، ئېغىلىمزىدا قانچە قوي، قانچە كالا بارلىقىنىمۇ سانىيالمايتتىم. مىليون، تىرلىيون… دېگەندەك سانلارنى ئاڭلاپمۇ باقمىغان ئىدىم.
ۋەتىنىمىزنىڭ تەكلىماكانغا يېقىن بىر كىچىك يېزىدا تۇغۇلدۇم ۋە سىز دېمەتلىك ۋاقىتلىرىمدا توغۇلغان كىچىك مەھەللىنىلا ئاران بىلەتتىم ياكى بىلمەيتتىم. ھەتتا، يېزا بازىرىغىمۇ چىقىپ باقمىغان بولسام كېرەك.
ئۇ ۋاقىتلاردا يەسلى دېگەن مەكتەپ يوق ئىدى، باشلانغۇچ مەكتەپتىنىڭ ئالدىدىن بىر نەچچە قېتم ئۆتۈپ باققان بولسام كېرەك.
مەن ئاق بىلەن قارا ۋە يېشىل رەڭلەرنى بىلسەم كېرەك ئۇ ۋاقىتلاردا. بولمىسا، جېق نەرسىلەرنى توپا رەڭ، پو رەڭ، ئاسمان رەڭ، مايسا رەڭ … دېگەندەك ئۇسۇلدا ئاتىشىم مۇمكىنتى.
ئۇ ۋاقىتلاردا قوغلاشماق، مۈكۈمۈكۈلەڭ، توپىلارغا مىلىنىپ ئوينىماق دېگەندەك ئوينالارنى بىلسەم كېرەك. ھەم بلوك پارچىلىرىمۇ يوق ئىدى. چالما ۋە سېغىزلاردىن بىر نەرسىلەرنى تىزىپ ئوينامدۇق، ھېچ ئىسىمدە يوق. قاتناش قوراللىرىدىن پەقەت ئىشەك ۋە ئات ھارۋىسىنىلا بىلەتتىم.
بەلكىم ياخشى كۆرىدىغان نەرسە ۋە ئىشلار بولىشى مۇمكىن، لېكىن ئىپادە قىلالامدىم، ئۆزۈم قارار ئالالامدىم… بۇلارنى ھېچ ئەسلىيەلمەيمەن.
قىسقا سۈرە… ۋە بالىلار قوشىقى دېگەندەكلەردىن ھېچنىمىنى يادىغا بىلمىسەم كېرەك.
بۇلار، بىر ئولتۇرغانچە مۇنداقلا سېلىشتۇرۇپ باققانلىرىم، ئوغلۇم! مەيلى قايسى تەرەپتىن ئويلاي، سىزدىن پەخىرلەنمەي، ھۇزۇر ئالماي تۇرالمايمەن. بەش ياشقا كىرگەن كۈنىڭىزدە سىزگە ئەڭ گۈزەل دۇئا ۋە تىلەكلىرىم بىلەن بۇ ئاددىي خاتىرىنى يېزىپ ئولتۇرىمەن. گەرچە بۇلارنى ھازىر تولۇق ئوقۇيالمىسڭىزمۇ، ئالدىمزىدىكى يىلدا ئاللاھ خالىسا بۇلارنى راۋان ئوقۇيالايدىغان بولىسىز ۋە بۇ خاتىرەمنى شۇ ۋاقىتتا ياكى تېخىمۇ كېيىن ئوقارسىز. تۇغۇلغان كۈنىڭىزگە مۇبارەك بولسۇن، كىچىك يىگىت! ئاللاھ ئىككىلى دۇنيادا ئالامچە بەخىت بەرسۇن!
